Prédikun séra Denis, 16. janúar 2005
Í dag hefst "Alþjóðleg bænavika kristinna manna fyrir samstöðu kristninnar" hér á landinu. Við biðjum fyrir einingu meðal allra kristinna manna, eins og Jesús sjálfur gerði. Jesús sagði: "Ég bið ... að allir séu þeir eitt, eins og þú, faðir, ert í mér og ég í þér, svo séu þeir einnig í okkur, til þess að heimurinn trúi, að þú hefur sent mig. (Jn 17.20-21)(Tkk 820-822) "Þráin um að endurheimta einingu allra kristinna manna er gjöf Krists og kall Heilags Anda. Að svara þessu kalli með viðeigandi hætti krefst ýmissa hluta:
- að kirkjan endurnýjist stöðugt í meiri tryggð við köllun sína; slík endurnýjun er drifkraftur þeirrar hreyfingar að leitað sé einingar;
- sinnaskipti hjartans, þar sem hinir trúuðu "leitast við að lifa enn heilagra lífi samkvæmt guðspjallinu"; því ótryggð limanna við gjöf Krists veldur sundrung;
- sameiginleg bæn, því að "sinnaskipti hjartans og heilagleiki lífs, ásamt almennum og einstaklingsbundnum bænum fyrir einingu kristinna manna, ber að líta á sem sál allrar hinnar samkirkjulegu hreyfingar og má með réttu kallast "andleg samkirkjustefna;"
Umhyggjan fyrir því að eining komist á "snertir alla kirkjuna, trúaða sem klerka". En við verðum að gera okkur grein fyrir því "að þetta helga viðfang - sættir allra kristinna manna í einingu hinnar einu og óskiptu kirkju Krists - er hafið yfir mannlegan mátt og hæfni." Þess vegna setjum við von okkar á "bænir Krists fyrir kirkjunni, í kærleika Föðurins til okkar, og í krafti Heilags Anda.""
Hefð er fyrir því hérlendis að Samstarfsnefnd kristinna trúfélaga á Íslandi (sem Kaþólska kirkjan á Íslandi tilheyrir) annist um framkvæmd vikunnar á höfuðborgarsvæðinu. Virku dagana verður gengið á milli söfnuða og bænastundir haldnar, t.d. í Kristskirkju í Landakoti verður haldin bænastund á miðvikudaginn nk., kl. 20:00.
Við minnumst einnig núna að í dag er stór hátíð "hins heilaga barns" í Filippseyjum. Gleðileg hátíð!